VANZELO IN LENGUA VENETA - Prefaçion

Introduçion storego-biblega al pì antigo dei quatro vanzeli canoneghi che publicaremo na stemana drio l'altra, un capitolo a la volta.

El patrono del popolo veneto el xé San Marco Evanzelista. Se sbalia chi che el pensa che el sia solche el patrono de Venezia, parché tute le diocesi sufraganee del Patriarcado de Venezia le à San Marco almanco come compatrono, insieme col patrono de la singola diocesi. D’altra parte, tuto el teritorio che el xèra soto al dominio del Stato da Tera de la Republega Serenissima el se reconosséa par el simbolo del leon co le ale, presente da par tuto in te le piasse e in te i palassi de quei che podemo ciamar ancora ancò “i Teritori veneti”.

Ma chi xèrelo, san Marco? Se pol dire che el xèra el sò “segretario” de san Piero, el Prinçipe dei Apostoli nominà diretamente da Jesù Cristo e primo Papa de la Cesa una, santa, catolega e apostolega. Par la dotrina cristiana, el sarìa quel Jovani Marco che vien cità ntei “Ati dei apostoli” del Novo Testamento, che el ghe andava drìo a san Paolo e san Barnaba e che, dopo un screçio co san Paolo (col qual el averìa fato pace in seguito, come che dimostra una de le letere scrite sucessivamente da san Paolo che lo nomina come "amigo fidatissimo") el sarìa passà al seguito de san Piero. El qual san Piero nol xèra mìa un omo de letere - el xèra infati un pescador, come che tuti sa - e partanto vien façile pensar che ghe servisse un omo istruìo come Marco par scriver le sò dò Letere Apostoleghe (Novo Testamento) e par tramandar le sò memorie del Cristo e dei fati che lo avéa visto protagonista direto de fianco al Verbo incarnà, Dio fatose omo, Nostro Signor Jesù Cristo..

El Vanzelo de Marco el xé el pì antigo, scrito almanco 10 ani prima de quel de Mateo e almanco 15 prima de quel de Luca che i lo à doperà come base, essendo scaturìo da Piero, par zontarghe particolari, parabole e vicende storeghe che à servìo a contestualizar con estrema precision i fati che riguarda la predicaçion e la vita publega de Jesù Cristo. Se pol datarlo, con sicuressa, come scrito fra el 55 e el 65 d.C. e el xé el pì curto dei 3 Vanzeli sinoteghi (“sinoteghi” ghe vol dire che i à la medesima otega, o punto de vista, overo un testo base comun che te pol lezerlo insieme in simultanea, sul qual se zonta le particolarità de ognun); el quarto Vanzelo, quel de Jovani, scrito intorno al 90 d.C. dal pì zovane dei apostoli, come che tuti sa el xé composto in modo diverso e el punta prima de tuto sul aspeto de la teologia, mentre quel de Luca el xé pì storego, quel de Mateo pì sacerdotal e quel de Marco el ponta su la regalità de Cristo; sta ultima roba de la regalità la xé uno dei motivi par cui a Marco ghe vien da sempre associà l’imagine del leon, re dei animài.

De Marco savemo anca che el poderìa esser stà el zovaneto che à scampà nudo quando che i à arestà Jesù, parché el xé un episodio che conta solo che lu e che corisponderìa col fato che sò mare de Marco la vien consideràda par una de le done che le fazéa parte de la sércia dei apostoli; savemo che el xèra in Italia quando che Paolo el xèra in prezon e quando che Piero el xé rivà a Roma; da Eusebio de Cesarea - storego del Cristianesimo antigo - e da la Tradiçion savemo anca altre robe: el sarìa stà invià a evanzelizar la X Regio Venetia et Histria, dove che el à insedià san Ermagora come primo vescovo de Aquileia e acompagnà san Prosdocimo a insediarse come primo vescovo de Padova, tuti e dò consacrài a la dignità vescovile diretamente da Piero; la legenda vol che ntel viazo de ritorno el abia sostà in te la laguna dove che ancora no ghe xèra la çità de Venezia, fondàda 4-5 secoli dopo, e che el àbia avesto la vision in sogno de un anzolo che ghe predizeva el fato che el so corpo da morto el averìa riposà in quel posto; savemo che a la morte de Piero el xèra un dei possibili sucessori come capo de la Cesa (el termine de “Papa” ancora nol esistéa), ma che inveçe el sucessore de Piero el xé stà san Lino e inveçe Marco el xé stà invià in mission a Alessandria in Egito, dove che el à fondà la cesa locale e dove che el xé stà martirizà e sepelìo. La vicenda relativa a come che i so resti i xé rivài a Venezia ntel IX secolo co l’impresa de Bon da Malamoco e Rustego da Torcelo i doverìa saverla tuti, parché la xé parfin rafiguràda da un dei maravejosi mosaici in te la faciàda de la Basilega de San Marco, dove che el xé sepelìo in te la cripta soteranea de la Basilega.

Sta traduzion la xé stàta fata par amor del Vanzelo e par amor del popolo veneto, co la sperança che la lengua mare la possa atirar a la letura anca chi che no se à mai acostà a la Bibia e che fin desso à solo sentìo brani leti a messa, magari distratamente e tanti ani indrìo, quando che da bocia ancora el ghe andava. Chi che scrive se à votà a San Marco e ghe dedica al popolo veneto tuto el sò impegno. Noialtri semo un popolo grando, ma la grandessa ne la à data sora de tuto la fede in Jesù Cristo e la devoçion a la Madona, a San Marco e al francescan Sant’Antonio. No bisogna mai desmentegarselo e inveçe el xé pien de omeni, e desso parfin qualche femena - che na volta el xèra impossibile! - che bestéma. Ogni bestéma la ne zonta tempo da star soto el comando de zente non veneta e la me sperança la sarìa de contribuir, magari co sto laoréto da niente, a resvejarghe el respèto par la sola "Verità che rende liberi" a quei veneti che averà la curiosità, la voja e la pasiença par lezere el Vanzelo de San Marco. In fin dei conti, el xé el pì curto dei 4 Vanzeli canoneghi e no ghe vol tanto tempo par farghela. Bona letura.

PAX TIBI MARCE EVANGELISTA MEUS