VANZELO DE SAN MARCO - Cap. X

Question sul divorzio

10Partìo da de là, el xé andà nel teritorio de la Judèa e oltre el Jordano. La fola la ghe à coresto da novo incontro e da novo elo el la amaestrava, come che el fazéa de solito. Un pochi de farisei i ghe se à viçinà, par meterlo a la prova, e i ghe à domandà: “Xélo permesso par un marìo de ripudiar la so mojer?”. Ma elo el ghe à risposto: “Cosa ve àlo ordenà Mosè?”. I ghe à dito: “Mosè el à permesso de ‘scriver un ato de repudio e de remandarla’”. Jesù el ghe à dito: “Par la durezza del vostro cuor elo el à scrito par voialtri sta norma. Ma in prinçipio de la creazion ‘Dio el li à creài mascio e femena; par questo l’omo el lassarà so pare e so mare e i do i sarà na sola carne’. Siché non i xé pì dò, ma una sola carne. L’omo dònca nol separe quel che Dio à unìo”. Tornài dentro a casa, i dissepoli i lo à interogà da novo su sto argomento. E elo el à dito: “Chi che repudia so mojer e ghe ne sposa n’altra, el comete adulterio contro de ela; se la femena repudia el marìo e ghe ne sposa un altro, la comete adulterio”

Jesù e i toseti

I ghe presentava dei toseti parché li carezzasse, ma i dissepoli i ghe criàva. Jesù, al vedere sta roba, el se à desdegnà e el ghe à dito: “Lassè che i toseti i vegna da mi e no stè impedirghelo, parché a chi che xé come lori ghe apartien el regno de Dio. In verità ve digo: Chi che non acolie el regno de Dio come un toseto, nol ghe andarà dentro”. E tolendoli in brazzo e metendoghe le man sora li benedizeva.

L’omo rico

Intanto che el andava fora par meterse in viazo, un tal ghe à corso incontro e, butandose zò in zanocio davanti a lu, el ghe à domandà: “Maestro bon, cosa ò da fare par aver la vita eterna?”. Jesù el ghe à dito: “Parché te me ciami bon? Nessun xé bon, se non Dio solo. Ti te conossi i comandamenti: ‘Non sta copare, non sta cometer adulterio, non sta robar, non sta dir falsa testimonianza, non sta frodar, onora el pare e la mare’”.

Elo alora el ghe à dito: “Maestro, tute ste robe le ò osservàe fin da la me giovinézza”. Alora Jesù, dopo averlo fissà, el lo à amà e el ghe à dito: “Te manca solche na roba: va’, vendi quelo che te à e dàghelo ai poaréti e te averà un tesoro in çielo; po’ dopo vien e vienme drìo”. Ma elo, ratristà par quele parole, el xé andà via aflìto, parché el avéa tanti beni.

El pericolo de le richezze

Jesù, vardandose intorno, el à dito ai so dissepoli: “Quanto difiçilmente quei che à richezze andarà dentro ntel regno de Dio!”. I dissepoli i xé restài stupefati a ste so parole; ma Jesù el à rescominçià: “Fioléti, come che el xé difiçile de andar dentro ntel regno de Dio! El xé pì façile che un camelo el passe par la cruna de na gusèla, che un rico el vada dentro ntel regno de Dio!”. Ei, ancora pì sbigotìdi, i dizéa fra de lori: “E chi saràlo mai che poderà salvarse?”. Ma Jesù, vardandoli, el à dito: “Impossibile presso ai omeni, ma non presso a Dio! Parché tuto el xé possibile presso a Dio!”.

Recompensa promessa a la renunzia

Piero alora el ghe à dito: “Eco, noialtri se à lassà tuto e te avemo seguìo”. Jesù ghe à risposto: “In verità, in verità ve digo: non ghe xé nessun che el abia lassà casa o fradei o sorele o mare o pare o fiòi o campi a causa mia e a causa del vanzelo, che nol receva zà al presente çento volte tanto in case e fradei e sorele e mari e fiòi e campi, insieme a persecuzion, e ntel futuro la vita eterna. E molti dei primi i sarà ultimi e i ultimi primi”.

Terzo anunzio de la passion

Intanto che i xèra in viazo par andar su a Jerusaleme, Jesù el caminava davanti de lori e eli i xèra stupìdi; quei che vegneva par da drìo i xèra pieni de timor. Tolendo da novo in desparte i Dodeze, el à scominçià a dirghe quelo che ghe sarìa sucesso: “Eco, noi andemo su a Jerusaleme e el Fiol de l’omo el sarà consegnà ai somi sacerdoti e ai scribi: i lo condanarà a morte, i ghe lo consegnarà ai pagani, i lo schermirà, i ghe spuarà dosso, i lo flagelarà e i lo coparà; ma dopo tre zorni el resussitarà”.

La domanda de so fiòi de Zebedeo

E ghe se à viçinà Jacomo e Jovani, so fiòi de Zebedeo, dizendoghe: “Maestro, noi volemo che ti te ne fazessi quelo che te domandemo”. Elo el ghe à dito: “Cosa voléo che mi fazza par voialtri?”. I ghe à risposto: “Concédene de sentarse ne la to gloria un a la to destra e un a la to sinistra”. Jesù el ghe à dito: “Voi non savé quelo che domandé. Podéo ber el calice che mi bevo, o ricever el batesimo col qual mi son batezà?”. I ghe à risposto: “Lo podémo”. E Jesù el ghe à dito: “El calice che mi bevo anca voialtri lo beverè, e el batesimo che mi ricevo anca voialtri lo riceverè. Ma sentarve a la me destra o a la me sinistra nol sta a mi de concederlo; el xé par quei par i quali el xé stà preparà”.

I capi i à da servir

Al sentir questo, i altri dieze i se à desdegnà con Jacomo e Jovani. Alora Jesù, dopo averli ciamà a sé, el ghe à dito: “Voi savè che quei che i xé retegnesti capi de le nazion i le domina, e i so grandi i esercita su de queste el potere. Fra de voialtri però nol xé così; ma chi che vol esser grando fra de voi el se farà vostro servidor, e chi che vol esser el primo fra de voi el sarà el servo de tuti. El Fiòl de l’omo infati nol xé vegnesto par esser servìo, ma par servir e dar la so vita in riscato par molti”.

El orbo a la ussìda de Jerico

E i xé rivài a Jerico. E intanto che el partiva da Jerico insieme ai dissepoli e a tanta fola, so fiol de Timèo, Bartimèo, orbo, el xèra sentà drìo la strada a mendegar. Costui, al sentir che ghe xèra Jesù Nazareno, el à scominçià a çigàre e a dir: “Fiol de Davide, Jesù, abi pietà de mi!”. In tanti i ghe dizéa su par farlo tasere, ma elo el çigava pì forte: “Fiol de Davide, abi pietà de mi!”.

Alora Jesù el se à fermà e el à dito: “Ciamèlo!”. E i à ciamà el orbo dizendoghe: “Corajo! Tirate su, el te ciama!”. Elo, tràto via el mantelo, el xé saltà su in piè e el xé vegnesto da Jesù. Alora Jesù el ghe à dito: “Cosa vuto che mi te fazza?”. E el orbo a lu: “Rabbunì, che mi riabia la vista!”. E Jesù el ghe à dito: “Va’, la to fede la te à salvà”. E subito el à riavesto la vista e el à scominçià a andarghe drìo par la strada.