VANZELO DE SAN MARCO - Cap. IV
Jesù el insegna in parabole
Parabola del semenador
4Da novo el se à metesto a insegnar in te la riva del mare. E ghe se à riunìo intorno na fola enorme, tanto che el xé montà su sora na barca e el xé restà là sentà, stando in mar, intanto che la zente la stava a tera drìo la riva. El ghe insegnava un mucio de robe in parabole e el ghe dizéa ntel so insegnamento: “Scolté. El xé vegnesto fora el semenador a semenar. Intanto che el semenava, na parte la xé cascàda drio la strada e i xé vegnesti i osei e i la à magnàda. N’altra la xé cascàda in mezo ai sassi, dove non ghe xèra tanta tera, e subito la xé spontàda parché non ghe xèra un teren profondo; ma quando che se à levà el sole, la xé restàda brusàda e, non avendo raìze, la se à secàda. N’altra la xé cascàda in mezo ai spin; i spin i à cressesto, i la à sofegàda e non la à fato fruto. E n’altra la xé cascàda nte la tera bona, la à fato fruto che el xé vegnesto su e el xé cressesto, e la à rendesto adesso el trenta, adesso el sessanta e adesso el çento par uno”. E el dizéa: “Chi che à rece par intender, che el intenda!”.
Parché che Jesù el parla in parabole
Quando che dopo el xé restà da solo, i soi insieme ai Dodeze i lo à interogà su le parabole. E el ghe à dito: “A voi altri ve xé stà confidà el mistero del regno de Dio; a quei de fora inveçe tuto el ghe vien spiegà in parabole, parché:
i varde, ma no i veda, i scolte, ma no i capissa,
parché no i se converta, e ghe vegna perdonà”.
Spiegazion de la parabola del semenador
El à continuà dizendoghe: “Se non capì sta parabola, come podaré capir tute le altre parabole? El semenador semena la parola. Quei drìo la strada i xé quei dove che la vien semenàda la parola; ma quando che i la scolta, subito el vien Satana, e el porta via la parola che la xé stà semenàda in lori. Al stesso modo quei che riceve la semença in mezo a le piere i xé quei che, quando che i scolta la parola, subito i la tole con gioia, ma non i à raìza in se stessi, i xé incostanti e quindi, quando che riva qualche tribolazion o persecuzion par causa de la parola, subito i se demoraliza. Altri i xé quei che riceve la semença in mezo ai spini: i xé quei che à scoltà la parola, ma vien le preocupazion del mondo e l’ingano de la richezza e tute le altre bramosie, che le sofega la parola e questa la resta senza fruto. Quei po’ che riceve la semença su un bon teren, i xé quei che scolta la parola, i la tole con sè e i porta fruto nte la misura chi del trenta, chi del sessanta, chi del çento par uno”.
Come ricever e trasmeter l’insegnamento de Jesù
El ghe dizéa a lori: “Se pòrtela forse la lampada par meterla soto al mogio o soto al leto? O pitosto par meterla sul lampadario? Non ghe xé niente infati de sconto che nol abia da esser manifestà e niente de segreto che nol abbia da esser metesto in luce. Se uno el à rece par capir, che el capissa!”.
El ghe dizéa a lori: “Fazé atenzion a quel che sentì: Con la stessa misura che adoperé par misurar, vegneré misurài anca voi altri, anzi ve sarà dà de pì. Parché a chi che à, ghe vegnerà dà e a chi che non à, ghe vegnerà cavà anca quelo che el à”.
Parabola de la semença che sponta da sola
El dizéa: “El regno de Dio el xé come un omo che trà la semença in tera; che el dorma o che el veja, de note o de dì, la semença la buta e la cresse; come, el medesimo no lo sa. Parché la tera la produze da ela sola, prima el stelo, po’ la spiga, po’ el granelo pien in te la spiga. Quando che el fruto el xé pronto, subito se tole in man la falçe, parché la xé l’ora de tajar”.
Parabola del granelo de senapa
El dizéa: “A cosa xélo che podemo paragonar el regno de Dio o con qual parabola xélo che podemo descriverlo? El xé come un graneleto de senapa che, quando che el vien semenà in tera, el xé el pì picolo de tute le semençe che ghe xé su la tera, ma apena semenà el cresse e el vien pì grando de tuti i prodoti de l’orto e el fa rami tanto grandi che i osei del çielo i pole repararse a la so ombra”.
Conclusion su le parabole
Con tante parabole de sto zenere el ghe anunçiava la parola secondo quel che i podéa capire. Senza parabole nol ghe parlava, ma in privato, ai so dissepoli, el ghe spiegava ogni roba.
La tempesta chetàda
Quel stesso dì, verso sera, el ghe à dito: “Passemo a l’altra riva”. E lassàda la fola, i lo à tolto con lori, così come che el xèra, nte la barca. Ghe xèra anca altre barche co lu. Intanto se avéa levà na gran tempesta de vento e la tirava onde dentro la barca, tanto che ormai la xèra piena. El stava par conto suo a popa, sul cussin, e el dormiva. Alora i lo à svejà e i ghe à dito: “Maestro, non te interessa se morìmo?”. Svejà, el ghe à crià al vento e el ghe à dito al mar: “Tasi, calmate!”. El vento el se à chetà de colpo e dopo ghe xé stà na gran calma. Dopo el ghe à dito: “Parché séo così paurosi? Non avéo mia ancora fede?”. E i xé stà ciapài da na gran paura e i se dizéa l’un con l’altro: “Chi xélo alora sto qua, che anca el vento e el mar i lo scolta?”.