VANZELO DE SAN MARCO - Cap. II

Prosecuçion del primo periodo del ministero publico de Jesù Cristo

Guarigion de un paralitico

2Dopo un pochi de dì el xé andà dentro da novo a Cafarnao. Se à vegnesto a saver che el xèra in casa e se à radunà tante persone, da non catar pì posto nianca davanti a la porta, e el ghe anunçiava la parola.

I xé andài da lu con un paralìdego portà da quatro persone. Non podendo però portarghelo davanti, par via de la calca, i à verto el cuerto sora a dove che el se trovava e, fata na apertura, i à calà el letin dove che stava el paralìdego. “Fioleto, te xé rimessi i to pecàdi”.

Sentài là ghe xèra un pochi de scribi che i pensava in cuor suo: “Parché sto qua el parla cusì? El bestema! Chi xélo che pol remeter i pecàdi se non Dio solo?”

Ma Jesù, avendo subito conossesto nel sò spirito che i pensava cusì tra sé, el ghe à dito: “Parché penséo cusì nei vostri cuori? Cosa xélo pì façile: dirghe al paralìdego: Te xé rimessi i to pecàdi, o dirghe: Lèvate su, toli su el to letin e camina? Adesso, parché savé che so Fiol de l’omo el à el poder sora la tera de remeter i pecàdi, te ordeno – el ghe à dito al paralìdego – lèvate su, tol su el to letin e va’ a casa tòa”. Quelo el se à levà su, el se à tolto su el so letin e el à caminà via davanti a tuti e tuti i se à maravejà e i à lodà Dio dizendo: “Non avemo mai visto niente de compagno”.

Ciamàda de Levi

El xé andà fora da novo in riva al mare; tuta la zente la vegneva da lu e elo el li amaestrava. Passando, el à visto Levi, so fiol de Alfeo, sentà al banco de le imposte, e el ghe à dito: “Vienme drìo”

E lu, levà su, el ghe xé andà drìo.

Pasto coi pecadori

Intanto che Jesù el stava a disnar in casa de lu, tanti publicani e pecadori i se à metesti insieme con Jesù e i sò dissepoli; i xèra tanti infati quei che ghe andava drìo. Alora i scribi de la sèta dei farisei, vedendolo magnar coi pecadori e i publicani, i ghe dizéa ai so dissepoli: “Come mai che el magna e el beve in compagnia dei publicani e dei pecadori?”. Avendolo sentìo, Jesù el ghe à dito a lori: “Non xé i sani che i à bisogno del dotore, ma i malài; non son vegnesto par ciamar i justi, ma i pecadori”.

Discussion sul digiuno

Adesso i dissepoli de Jovani e i farisei i xèra drio far un digiuno. I xé andài alora da Jesù e i ghe à dito: “Parché i dissepoli de Jovani e i dissepoli dei farisei i digiuna, e inveçe i to dissepoli non i digiuna mìa?”. Jesù el ghe à dito: “Pòdeli forse digiunar i invitài a nozze quando che el sposo el xé con lori? Finché i à el sposo con lori, non i pol digiunar. Ma vegnerà i dì che ghe sarà portà via el sposo e alora i digiunarà. Nessun cusìsse na pezza de stofa greza su un vestìo vecio; senò el tacon novo el sbrega quel vecio e se fa un sbrego pezo de prima. E nessun versa vin novo in otri veci, senò el vin el spaca i otri e se perde vin e otri, ma vin novo in otri novi”.

Le spighe cavàe su

In dì de sabo Jesù el passava par i campi de formento, e i dissepoli, caminando, scominçiava a cavar su le spighe. I farisei i ghe à dito: “Vedito, parché fali de sabo quelo che nol xé permesso?”. Ma el ghe à risposto: “Non avé mai leto cosa che el à fato Davide quando che el se à catà in bisogno e el à avesto fame, lu e i so compagni? Come che el xé andà dentro nte la casa de Dio, soto al somo sacerdote Abiatàr, e el à magnà i pan de l’oferta, che solo che ai sacerdoti ghe xé permesso de magnarlo, e el ghe n’à dà anca ai so compagni?”. E el ghe dizéa: “El sabo el xé sta fato par l’omo e no l’omo par el sabo! Par questo so Fiol de l’omo el xé signore anca del sabo”.