PAGINE VENETE - Boletin setimanal in lengua veneta

Rubrica de atualità par esercitarse a lezer e proàr a scriver in veneto, senza la pretesa de insegnar ma solche con quela de capirse

NOVA RUBRICA DE INFORMAZION IN LENGUA VENETA CON DO' ARTICOLI AL COLPO - IN CIARO SOLO PAR LE PRIME STEMANE E DOPO LA SARA' VISIBILE SOLO PAR CHI CHE SE ISCRIVE AL SITO

L’Europa e la so’ deriva antidemocratica: el caso Georgescu e l’esclusion de l’AfD in Germania

Intanto che i vertesi de l’Union Europea i continua a proclamarse paladini de la democrazia e dei diriti çivili, la realtà dei fati la çertifica na deriva sempre pì preocupante. El monito del vicepresidente american J.D. Vance a la Conferenza de Monaco nol xé sta solo che esercizio retorico: el rapresenta na denunçia esplicita de na situazion che la se sta deteriorando sempre de pì. La libertà politica, la rapresentanza democratica e i diriti fondamentali dei çitadini europei i xé minaciài da un sistema che, drìo la maschera de le istituzion liberali, el impóne con sempre pì violenza un pensar unico che el tolera sempre manco el dissenso.

Emblematico el xé el caso de l’aresto de Georgescu in Romania. Al de là de le acuse specifiche, el resta un sospeto fondà che se trate de l’enesimo episodio de repression mascheràda da legalità. No la xé çerto la prima volta che i strumenti judiçiari i vien doparà par eliminar politicamente figure scomode, speçialmente quele che le se opón al globalismo dominante e al controlo tecnocratico imposto da Bruxelles. Un mecanismo ben rodà, che el trasforma le sale dei tribunałi in te n’arena de lota politica, desvodando el processo democratico de ogni credibilità.

Paralelamente, in Germania se vede n'altro segnal inquietante de ‘sta involuzion autoritaria: la “conventio ad excludendum” contro l’AfD. Nonostante i risultati eletorài che i çertifica na adesion popolar sempre pì forta a le so' proposte politiche, tuti quanti i altri partiti todeschi i se gà coalizài par escludarlo da ogni prospetiva de governo. Na mossa che la tradisse la volontà de l’eletorato e che la smaschera el vero muso del sistema: la democrazia la val solche quando la favorisse chi che zà detien el potere. Quando che inveçe le urne le mostra na volontà alternativa, ecco che se recore a cordoni sanitari e a manovre de ostracisazion indegne de na democrazia matura.

'Sto dò pesi e dò misure el mina le fondamenta stesse de la libertà politica in Europa. La repression judiçiaria de l’opositor, l’esclusion sistematica dei partiti scomodi, la demonisazion de ogni vose che no la canta col coro, i xé sintomi ciari de un sistema che nol tolera el dissenso. Le élites europee, inveçe de confrontarse sul pian de le idee, le se mete su la strada de l’imposizion e de la censura.

La domanda la vien spontanea: fin a quando i çitadini europei i acetarà passivamente ‘sta deriva? La libertà no la xé na astrazion, ma un prinçipio che el va difeso con fermezza. Se l’Europa no la cambia de rota, el riscio el xé de sbrissiar sempre de pì verso un model oligarchico travestìo da democrazia. E rivài là, el sarà massa tardi par renderse conto de quanto che se gà perso.

Cao de l'Ano: Un augurio veneto identitario e na promessa de impegno

In tel dì del "Cao de l'Ano" che la tradizion veneta celebrava el primo de marzo, vojo mandar el me' augurio pì sincero a tuto el mondo identitario veneto e a chi, inte le varie patrie d'Europa e del mondo, el sente l'urgenza de descovrir da novo le raìse profonde dei so' popoli.

El Cao de l'Ano nol xé, par noialtri veneti, solo na rievocazion folkloristica. Nol xé na nostalgia sterile de un passà idealizà, ma se trata de un ato de testimonianza viva de la specificità de la nostra nazion veneta, un segno de continuità storica che ne liga ale nostre istituzion, ala nostra cultura, ala nostra çiviltà. Celebrar el Cao de l'Ano "more veneto" nol vol mìa dir negar o meter in discussion l'adesion al calendario comun, quel che la Republica Serenissima stessa l'avéa adotà, no par sottomission, ma parché coerente con la so identità cristiana e catolica. La Serenissima la jera un Stato cristian, consapevole che el tempo el xe de Dio e che el computo del tempo nol xe mai neutro, ma el gà sempre un significato spiritual e politego.

Epur, drio al calendario universal, la Serenissima la conservava con jelosia l'uso del so calendario tradizional, espression de na continuità politega e cultural che la radicava la coscienza veneta in te na storia milenaria. Quel dopio binario — l'apartenenza piena ala Cristianità e la salvaguardia de la propria specificità cultural e istituzional — el xe el paradigma che anca ancò, da veneti identitari, volémo ripropor.

El Cao de l'Ano, cussì, el xe un invito a descovrir da novo chi che semo, a ricordarse che el Veneto nol xe na semplice region aministrativa de la Republica Italiana, ma la xe na nazion senza Stato, un popolo con na storia, na lengua, un diritto e na cultura sòa e comunemente condivisa, che nol gà mai rinunzià ala so' vocazion ala libertà e al autogoverno. Un popolo che gà el dirito e el dover de çelebrar la so' memoria, de tramandarla ai zoveni, de trasformarla in progeto politego.

Come esponente e militante del independentismo veneto, mando in sto giorno un apelo a tuti quei che i sente de far parte de sta gran tradizion de libertà: lavorémo insieme, pacificamente e democraticamente, par ricostruir la nostra cossienza nazional e par riafermar el dirito del Veneto a esser protagonista de la so' Storia. No un progetto nostalgico o reazionario, ma na vision par l'ancò e par el doman, nel respeto de la legalità e inte la strada segnàda da la Providenza, che la guida i popoli coi tempi e coi modi che solche Dio el conosse.

Inte el segno del Cao de l'Ano, ghe rinovo a tuto el popolo veneto identitario e a tuti i popoli d’Europa che i xe in camino par descovrir da novo la so' identità, i mejo auguri de un ano de risvejo, de consapevolezza e de impegno par la libertà e par la verità.